"الناس على دين ملوكهم"

من المضحك جداً إن بعض الناس تتهم ناس تانية بالسطحية الشديدة مع إن هما إلي بيعانو من بعض الجهل. "الناس على دين ملوكهم" أنا قررت إنهردة أتكلم فالموضوع ده و اكتب كمان بالعربي مع اني عرفة اني ممكن أعمل أخطاء إملائية كتير، بس الأخطاء عمرها ما كانت عيب، الإعتراف بالخطأ أول طريق للاصلاح.

زي ما قلت فوق الناس على دين ملوكهم، أيام الملك كانت مصر عملة ازاي؟ مصر كانت من أكتر البلاد رقياً و حضارة، جمال اه و نظافة اه و شياكة اه و حلاوة اه. الناس كانت شبعانة و محترمة زي ملوكهم. كان عندنا حاجة اسمها إقتصاد، الإقتصاد اللي الناس إللي في سننا تقريباً عمرهم ما شافوه مرتفع. كانت ناس محترمة و متدينة بيطبقو الدين فالبيت، الإحترام والفضيلة كانو شئ عادي و طبيعي في كل بيت، كانت ناس عرفة يعني اه دين, يعني اه دين بجد، كان الدين المعاملة مش التدين المظهري اللي باءة في كل حتة، ناس كانت عايشة في سلام مسلمين و مسحيين و يهود. أيوة يهود، عشان ده التدين اللي بحق و حقيقي، معتقدش حد من زمنهم كانو عمرو ممكن يخاف مل فتنة الطائفية إللي سبحان الله بأت حاجة مرعبة و عادي جداً انها تحصل مع إن الناس بأت المفروض يعني متدينة. كان الشارع المصري بيتميز بالإحترام. عشان حكامهم كانو محترمين. أيوة كان في إحتلال في وقت و كان في حروب في أوقات تانية بس الناس كانت عايشة و مرتاحة و راضية، عارفين يعني اه راضيين؟ عندهم أكل نضيف، اولادهم مش بس بيتعلمو لأ كمان عايزين يتعلمو و يبئو أحسن. 

جت الثورة و فجأة بدأت بوادر تغير تبان عالمواطن. مع الأيام بدأ الإنحدار، كل سنة أسوأ من اللي قبلها. الناس مبقتش الناس ولا الشوارع بقت شوارع، بقت النظافة رفاهية والإحترام باءة شئ نادر لم تشوفو متصدقش و تقول ياه ده لسة في ناس محترمة أهو. باءة عادي انك تلاقي واحد بيتبول على جانب الطريق وعادي جداً لما واحد ينف أو يتف و يمسح فالسور, مش كدا بس لأ ده كمان باءة في تحرش و معاكسة و كلام بذيء و تصرفات غير مسؤولة و غير محترمة. مبقاش حد طايق حد. إنحدار فالذوق العام إنحدار فالأخلاقيات.

 لما حسني مبارك جه الناس بقت على دينو. هو مش شبعان هو بيسرقنا والناس بأت زيو، مش شبعانة، حرامية. الرشوة بقت حاجة عادية. والمحسوبية مبقتش توجع الودن لما تسمعها. بقى جمال مبارك يعد مع ناس أكبر منه سنا و علماً و مكانة و يعاملهم بقمة قلت الإحترام. فكان طبيعي جداً لما تلاقي العيال بتشتم أهلها و يشتمو الكبار فالشارع. و عادي جداً جداً بردو لما نلاقي إلناس نسيت يعني اه "من علمني حرفاً صرت له عبداً" و بأو عادي يضربو المدرسين. مش بقولكو الناس على دين ملوكهم؟

 نيجي فجأة نلاقي من اللي يمسك البلد بعد ثورة مات عشنها ناس؟ بعد ثورة المفروض انها ابهرت العالم؟ بعض ثورة المفروض انها ثورة عل ظلم والغلط والفساد..  واحد من جماعة بتؤمن إن الست مكانها بيتها، طبعاً في حالة انها مطلقة أو عانس الوضع يختلف، هي كدا ممكن تشتغل. نيجي نلاقي الرئيس الجديد بيستنكر إن بنتو تلبس "البنطلون" و بعدن نتهم احنا بالسطحية الشديدة. فجأة نلاقي رئيس بيقول إن احنا معندناش حالة عنف من الزوج  ضد الزوجة للضغط عليها عشان المعاشرة الزوجية، و احنا ماشالله من أكتر البلاد إللي عندنا عنف ضد المرأة عامةً مش بس عشان المعاشرة الزوجية لأ عشان احنا تاني أكتر دولة عندها ختان و عادي الواحد يضرب مراتو عشان جه ملقاش أكل و عادي أخ يقتل أخته عشان شك في سلوكها، عادي عادي، كلو عادي، احنا سطحيين جداً فعلاً. فجأة رئيسنا يبئة بينتمي لجماعة سياسية بتدي رشاوي عشان توصل لحكم البلد، و سبحان الله في نفس الوقت بتوعد بتطبيق الشريعة، علاقل لو كان شفيق ولا مبارك ادو رشاوى فهما مكنوش لابسين رداء الدين. والأهم إن احنا فجأة نلاقي رئيس البلد مش هو صاحب القرار، المرشد هو المتحكم فيه، يعني لا مؤاخذة طرطور. عايزين باءة الشعب يبقى عامل ازاي؟ 

الناس مش حتشبع عشان حكامنا مش شبعانين، الجشع حيزيد عشان كلنا عارفين حال الاخوان. مش بس كدا لأ شوف باءة "ما بني على باطل فهو باطل" اللي أخد الحكم بالغش والضحك عل ناس لايمكن ننتظر مل ناس انها تتغير عشان ملوكهم فاسدة. واللي يضحك أكتر و أكتر الناس اللي فكرة إن التعليم حيتطور، مبدئياً كدا التعليم واخد في مشروع النهضة اللي هو 80 صفحة ما يوازي صفحة. و بعدن الناس اللي أصلاً كسبت بجهل الناس تفتكرو عمرها ممكن تدمر المصدر الأساسي لمكسبها و تعلم الناس؟ مظنش